Fyrsti í aðventu og jólaföndur

Nú er desember kominn og styttist alltaf í jólahátíðina. Ég setti mér markmið að njóta í desember og vera aðeins meira jóló. Ég er nýkomin heim úr sólarfríi, vikuslökun sem var kærkomið og gott fyrir sálina. Endurnærð, afslöppuð og tönuð! til í jólatíðina sem er framundan. Fyrsti í aðventu þetta árið var því óhefðbundin og eytt á ströndinni að hlusta á hljóðbók í sólbaði.

Þetta verða önnur jólin heima í húsinu okkar og því gaman að læra á og búa til nýjar hefðir. Áður en ég fór til sólarlandanna átti ég yndislegan jólaföndurdag með vinkonu. Við hlustuðum á ljúfa tónlist og áttum góða stund í algjörri núvitund að skapa og njóta. Við nýttum efni sem við áttum í föndurkössum, dagblöð og ýmiss konar rusl til að búa til fallega jólakransa. Hér má sjá afraksturinn, tvær tegundir af krönsum …

Í stað þess að kaupa fullt af nýju efni til að föndra er gott að skoða hvað maður á til heima. Auðveldlega er hægt að vefja saman dagblöð til að búa til krans. Svo er efni vafið utanum, við áttum velúrefni en það er líka hægt að nota til dæmis gömul sængurver eða púðaver. Mikilvægast er að leyfa hugmyndaraflinu að blómstra.

Í föndurkassanum var ýmislegt skemmtilegt sem við gátum notað til að skreyta kransinn. Fjaðrir, rifnar blaðsíður úr gömlum bókum, glimmerborðar og fleira. Allt fest vel á með föndurvír.

Mikilvægast þegar maður er að föndra er að njóta. Ekki setja of miklar kröfur á sig og leyfa sér að prófa og skapa. Útkoman er alltaf falleg, sama hvað!

Næsti krans var búinn til úr kaffipokum og því ótrúlega ódýrt föndur. Ég átti frauðhring sem undirstöðu en hægt að nýta ýmislegt annað. Kaffipokarnir eru svo krumpaðir saman í knippi, því þarf ekkert að eltast við neinn fullkomleika. Ég notaði svo títuprjóna til að festa knippin saman og á frauðhringinn.

Svo endurtekur maður oft og mörgum sinnum þar til manni finnst kransinn orðinn þéttur og flottur.

Ég klippti jólatrés-þríhyrninga úr blaðsíðum úr gömlum bókum. Ég ákvað að setja fjögur tré á kransinn og því yrði hann að aðventukransi í stað þess að vera með kertakrans þetta árið. Trén festi ég á grillprjóna og stakk ofaní frauðhringinn. Sniðugt væri að útfæra þetta föndur í samverudagatal. Þá væri hægt að skrifa skemmtilegar hugmyndir að samverustundum aftaná eða inní trén.

Óhefðbundinn aðventukrans þetta árið.

Þið megið endilega senda mér myndir eða hugmyndir af jólaskreytingum hjá ykkur. Ég er alltaf að leita mér að innblæstri og gaman að sjá jólahefðir hjá öðrum. Ég hef verið dugleg að skoða undanfarið Pinterest fyrir sniðugar hugmyndir að jólaföndri og heimagerðum jólagjöfum. Um helgina langar mig að búa til litla grenikransa, en ég þarf aðeins að hugsa hvernig ég ætla að útfæra þá. Deili með ykkur ef það heppnast vel og vandlega!

Bestu,
Anna

| Fylgstu með á instagram @okkarheima